LEGAZPI CITY- Ikinahahandal ngunyan na mabawi an enot nang deklarasyon kan probinsya kan Sorsogon bilang ‘drug-cleared province’ makalihis na maarestar sa ipigkondusir na anti-illegal drugs operation an sarong overseas Filipino worker (OFW).
Sa nagunong impormasyon kan Bombo Radyo Legazpi, nabisto an suspek na si Rowan Gaon Fresnido na nakuwaan pa nin tulong sachet nin pinagtutubudan na shabu asin P500 bilang buy bust money sa operasyon sa Brgy. Pang-Pang, Sorsogon City.
Katakod kan insidente, otomatikong ibabalik an nasambitan na barangay sa ‘drug affected status’ na nakalaag sa Dangerous Drugs Board Regulation #3, Series of 2017.
Marurumduman na Marso 3 sa presentreng taon kan mapag-araman na libre na sa impluwensya kan iligal na droga an 53 na drug affected barangay sa syudad kan Sorsogon na huring local government unit (LGU) na drug cleared na pinaglalaoman na maidedeklarar nang ‘drug-cleared province’ an Sorsogon.
Mientrastanto, nakatalaan man na magpasiring sa probinsya an Oversight committee sa maabot na Biyernes ngani na ma-validate an nakaabot na impormasyon asin ma-assess an sitwasyon sa lugar.
Nagpagirumdom man si Regional Peace and Order Council (RPOC) chairman asin Legazpi City Mayor Noel Rosal na dae paghidalion an proseso sa nasambitan na deklarasyon ngani na dae mahinog sa pirit an bunga kaini.
