LEGAZPI CITY — Dakulang kantidad nin iligal na droga an nakumpiskar kan mga otoridad makalihis an isinagibong anti-illegal drug operations sa Cortes St., Barangay Poblacion, Baleno, Masbate.
Nagkasararo an pwersa kan Baleno Municipal Police, Police Intelligence Branch (PIB) asin Municipal Public Safety Company (MPPSC) sa pagsagibo kan nasambitan na operasyon kontra sa No. 8 Municipal Drug Watchlist na si Melaniel Sia, 36-anyos asin Robin Padilla, 25-anyos na parehong residente kan nasambitan na lugar.
Sa paagi kan search warrant na bitbit kan team, naarestar an mga durugista asin nakumpiskar an mga drug paraphernalia.
Nasa kustodiya na ngunyan kan pulisya an sampulong pidaso nin dakulang pakete nin pinagtutubudang shabu, siyam na medium-sized asin doseng small-sized kan parehong droga.
Pigkakarkulong maabot sa P500,000 an street value kan nasambitan na ipinagbabawal na bulong.
Dinara an mga nakumpiskar na ebidensya sa Regional Crime Laboratory Office para sa eksaminasyon mantang nasa pag-ataman na kan Baleno MPS an mga suspek ngani na kahampangon an kasong pagbalgar sa Republic Act 9165 o an Comprehensice Dangerous Drugs Act of 2002.
