LEGAZPI CITY—Idineklarang gadan an 58-anyos na lalaki makalihis salpukon an pigmamaneho niyang puting utility van kan sarong dump truck sa kahalabaan kan tinampo sa boundary kan Barangay Puro asin Sitio Malangka Road, Barangay Taysan, Legazpi City pasado alas-dose nin udto kan Lunes, Hunyo 16.
Susog sa imbestigasyon, pasiring sa Brgy. Puro an van hale sa Centro Taysan kan makasabatan kaini an sarong dump truck na pigporbarang mag-overtake sa sarong nakaparadang trak na may raot.
Sa pababang parte kan tinampo, nagsalpukan an duwang behikulo, rason nganing magsapo nin malalang tama sa payo an driver kan van.
Naipit ini sa laog kan saiyang behikulo asin tulos pighale kan rumespondeng bumbero gikan sa BFP Legazpi.
Isinugod siya kan EQRT ambulance sa Legazpi City Hospital alagad idineklara man dead on arrival kan mga doktor.
Mantang dae man nakulugan an 25-anyos na drayber kan dump truck.
