LEGAZPI CITY – Inaguraran na an drive-thru service kan Land Transportation Office (LTO) Pili Extension Office sa Camarines Sur.
Sa intrevista kan Bombo Radyo Legazpi ki LTO Bicol Regional Director Francisco Ranches Jr., inatendiran mismo an okasyon kan mga bisita hali sa regional asin central offices.
Pinakabago asin pinakaenot na servicio na itatao sa Bicol kan nasabing extension office an drive-thru na pagproseso kan renewal registration.
Sigon ki Ranches, piglalaomang makakatabang ini sa pagtataong-convenience sa publiko.
Dae na kaya kaipuhan na magbaba sa behikulo sa pagproseso asin maagi na sana sa mga windows asin makukuwa na tulos makalihis an inspeksyon asin rehistrasyon.
Wara pa man nin siring na servicio na pig-oofrecir sa ciudad kan Legazpi urog na kaipuhan muna suboot nin private motor vehicle inspection centers (PMVICs) na kataid mismo kan LTO office.
