LEGAZPI CITY-Pigako ni Department of Public Works and Highways (DPWH) Secretary Manuel Bonoan na igwang mga ghost projects sa nagkapirang distrito sa Bulacan.
Sa imbestigasyon kan Senate Blue Ribbon Committee, dinikdik ni Senate President Pro Tempore Jinggoy Estrada si Bonoan huli sa igwang ghost projects sa Calumpit, Malolos, asin sa Hagonoy.
An kontratista kan mga “ghost” flood control projects sa Bulacan iyo an Wawao Builders, na saro sa 15 kontratistang nabanggit ni President Bongbong Marcos na nakakuwa kan kadaklan sa mga flood control contracts kan gobierno.
Sa Bulacan igwang 85 proyekto an Wawao Builders na nagkakantidad nin P5 bilyon pesos asin kabilugang P9 bilyon pesos sa bilog na nacion.
Pigsierto man ni Bonoan na mapapanimbag an agbos na imbuelto sa anomalya kun mapatunayan an mga ghost flood control projects.
Mientrastanto, pinasa-subpoena na man ni Estrada an may sadiri kan Wawao Builders na si Mark Allan Arevalo para sa mabusising imbestigasyon kan komite.
