LEGAZPI CITY-Nagbilog an Department of Public Works and Highway (DPWH) nin sarong Anti-Graft and Corruption Practices Committee para sa imbestigasyon kan mga maanomalyang flood-control projects sa manlain-laing parte kan nacion.
Sa ipinaluwas na Department Order no. 166 series of 2025 na siyang pinirmahan ni DPWH Secretary Manuel Bonoan, ipigpaliwanag na obheto kaini na magsagibo nin hararom na imbestigasyon sa mga flood-control projects asin posibleng korapsyon an rason kun sain imbuelto an nagkapirang opisyal asin empleyado kan ahensya.
Nakatalaga sa dokumento na mabilog man an ahensya nin sarong Technical Working Group kun sain itatalaga an secretariat na magtatao nin asistensiya na kaipuhan sa imbestigasyon.
Afuera digdi, tatawanan kan komite nin authorization ag mga miyembro kaini na mabisita asin mainspeksiyon kan mga flood-control project sites ngani makakuwa nin bastanteng datos asin impormasyon.
hale sa mga tanggapan asin departamento na igwang kapot kan mga nasabing proyekto.
Pigsusugo man na magbilog nin sadiring internal rules asin procedures an panel na ini dapat na nakasunod sa 2025 Rules on Administrative Cases in the Civil Service (2025 RACCS) asin iba pang mga katakod na Civil Service Commission rules asin regulations.
An komite an nakatalagang makipag-koordinar sa iba pang ahensya asin law enforcement bodies ngani mas matibay asin maayos an pagkuwa kan mga impormasyon hale sa prosecution na katakod pa sa mga nasabing flood-control projects.
Mientrastanto, nanindugan man si Bonoan na maski sisay man an maggibo nin katiwalian sa laog kan saindang ahensya, an dapat na mapanimbag sa ley asin kun posibleng maipakulong para sa ginibo nindang korapsyon sa laog kan ahensya.
