Idedesignar bilang bagong kalihim kan Department of Public Works and Highways (DPWH) si Department of Transportation (DOTr) Secretary Vince Dizon makalihis magbutas sa saiyang katungkulan si DPWH Sec. Manuel Bonoan.
An panibagong pagtatalaga na ini an may obheto na mas tawan nin pokus asin tawan aksyon an mga isyu na napapalibot ngunyan sa ahensya mapadapit sa maanomalyang flood control projects kun saen sinugo si Dizon na siertohon na an pondo an piggamit sa pagpapatindog kan mga imprastraktura na mapapakinabangan kan publiko.
Sisiertohon man na sa irarom kan liderato ni Dizon, mas mapapagayon asin isasairarom sa modernisasyon an transportation sector asin susuportaran an prayoridad sa kaligtasan kan mga komyuter asin mas mainam na project delivery.
Mientrastanto, an nasabing pagdesignar an may kinaaraman sa paninindugan kan presenteng administrasyon na maresolba asin mapanimbag sa ley an mga opisyal na naggibo nin katiwalian asin korapsyon asin dae nakakapagtao nin mga epektibong serbisyong publiko.
An pagbabago na ini an nangyari sa tahaw man liwat kan imbestigasyon sa mga maanomalyang mga flood-control projects sa manlaen-laeng parte kan nacion asin piglalaoman na magigin epektibo ngunyan na Lunes, Setyembre 1, 2025.
