LEGAZPI CITY — Nagpaluwas na an Department of Tourism (DOT) Bicol nin listahan kan mga accredited travel agencies asin tour operators ngani na matawan nin giya an mga turistang planong magbisita sa rehiyon sa papaabot na Semana Santa asin summer.
Sa intrevista kan Bombo Radyo Legazpi ki Antonette Esguerra, senior operations tourism officer kan DOT Bicol, inabisuhan kaini an mga posibleng turista na hanapon an DOT quality seal sa mga agencies na nagpapatunay na accredited an mga ini mantang ipigrekomenda an pagbisita sa website kan DOT ngani na mahiling an listahan.
Nagmonitor asin spot checking man an ahensya sa mga accredited agencies kun sain napag-araman an nagkapirang pagbalgar kan home-based travel agency sa polisiya kan pagtitindog nin opisina na saro sa mga pighahagad na requirement sa pagkua nin permit sa ahensya.
Pinagirumdom man ni Esguerra an nasambitan na mga ahensya na magsunod sa ipiglatag na regulasyon urog nang posibleng mauoli sa pagbawi nin accreditation permit an mga gigibuhon na pagbalgar enkaso mapatunayan na totoo.
Ngunyan na taon, target kan Bicol na maabot an 10% increase sa tourist arrival rating hali sa haros 20% na paglangkaw kaini kan nakalihis na taon kun sain nagsakat sa 4, 816, 317 an foreign asin domestic tourist arrival.
