LEGAZPI CITY- Liwat na nagpagirumdom an Department of Tourism (DOT) Bicol sa mga mabisitang turista urog na sa provincia kan Albay na magdoble-likay katakod kan mga aktibidad na harani sa bulkang Mayon.
Sa intrevista kan Bombo Radyo ki DOT Bicol Dir. Benjamin Santiago na susog sa pakikipag-olay sa Philippine Institute of Volcanology and Seismology (PHIVOLCS), mantenido an pagbabawal sa paglaog sa 6-kilometers Permanent Danger Zone (PDZ) mantang nasa Alert Level 2 status pa an bulkan.
Ikinahahandal kaya an posibilidad kan pagbaba kan mga sediments urog na sa south-southwest sector o sa nagkapirang river channels sa banwaan kan Camalig, Daraga siring man sa Sto. Domingo na dakol an natipon na loose materials durante kan pagparaputok.
Afuera sa pagbisita sa Mayon Skyline and Planetarium sa ciudad kan Tabaco, pigtutugutan naman an ATV rides alagad sa short distance sana.
Ipigduon man ni Santiago na urog na pigbabantayan an mga foreign tourists na mahihilig sa extreme adventures partikukar na sa posibilidad na liwat na makalusot sa danger zones siring kan nangyari durante kan Mayon eruption.
