LEGAZPI CITY – Ipigheras kan Department of Science and Technology (DOST) Bicol an saindang trayumpo sa nakalihis na mga taon sa paagi kan ikinondusir na 2024-2025 Performance Review.
Segun ki DOST Bicol Regional Director Rommel Serrano sa intrevista kan Bombo Radyo Legazpi na pigpresentar ninda an pira sa saindang programa kun sain an iba sa mga ini an planong gibuhon man sa ibang rehiyon.
Kabale man suboot sa performance review an pagpapatibay kan mga estratehiya para sa mga masunod na lakdang pasiring sa mas mauswag na kabikulan asin makipagsabayan sa ibang lugar pag-abot sa inobasyon asin teknolohiya.
Narisa man niya an dikit na pagtalubo kan rehiyon pag-abot sa performance sa ibong kan limitadong budget sa naunambitang peryodo kun kaya naglalaom siyang madugangan an saindang annual budget nganing dakol na mga Bicolano innovator an saindang matabangan.
Plano man kan opisyal na tutukan an pakikipagsabayan kan Bicol sa ibang rehiyon sa orolay kan Digital technology asin artificial intelligence sa paagi kan pagdadara asin paglalakop kaini sa mga komunidad sa paagi kan saindang mga programa.
Pagdoon niya man na mas nakaka-angat an rehiyon sa food technology na saro sa mga pigkukuwaan nin ganansya kan mga Bicolano kun kaya ini an mawot nindang mapa-uswag pa sa pagtatao ninda nin tabang.
Pig-orgolyo man ni Serrano an pagtatao nin scholarship sa mga estudyante sa gabos na mga munisipyo nganing makatabang sa mga komunidad sa paagi kan pag-access sa dekalidad na edukasyon.
 Bicol shared its success in recent years through the 2024-2025 Performance Review.){kind=link}