LEGAZPI CITY — Natawan nin livelihood opportunities an 70 residentes kan Sorsogon City asin apat na banwaan sa probinsya kan Sorsogon hale sa tie-up kan Department of Labor and Employment (DOLE) asin Technical Skills and Development Authority (TESDA).
Segun ki Raymond Escalante, tagapagtaram kan DOLE-Bicol, maabot sa P650,000 an kantidad kan livelihood kits na naresibe kan 70 graduates kan Special Training for Employment Program (STEP) kan TESDA.
Kumpwesto an mga benepisyaryo nin 9 dressmakers, 17 tune-up engine technicians, 9 construction painters, 17 cosmetologists asin 18 tile setters na hale sa manlaen-laen na barangay sa Sorsogon City asin sa mga banwaan kan Castilla, Magallanes, Barcelona asin Prieto Diaz.
An mga namamanwa haleng Sorsogon an enot na batch kan STEP beneficiaries na natawan nin livelihood kits sa enterong rehiyon.
Segun man ki Atty. Ma. Karina Perida-Trayvilla, DOLE-Bicol director, mauutob an totoong obheto na makapagkrear nin sustainable na alternatibong mapagkukuwaan nin kita sa paagi kan pinagsarong STEP kan TESDA asin livelihood programs kan DOLE-Bicol.
