Sienerto kan Department of Labor and Employment (DOLE) na makikinabang man sa umento sa sahod an mga minimum wage earners sa luwas kan Metro Manila.
Segun ki Labor Secretary Bienvenido Laguesma, limang Regional Wage and Productivity Boards na an nagpuon nin proseso para sa panibagong wage hike: Region 1 (Ilocos), Region 2 (Cagayan Valley), Region 3 (Central Luzon), Region 4A (Calabarzon), asin Region 7 (Central Visayas).
Segun ki Laguesma, ini an alinsunod sa sugo ni Presidente Ferdinand Marcos Jr. na magsagibo nin review sa laog kan 60 aldaw puon sa huring wage order.
Magigiromdomang an NCR wage board an enot na nagluwas nin bagong umento ngunyan na taon, aprubado kan Hunyo 30: P50 dugang sa sahod kan nasa 1.2 milyong obrero sa rehiyon. Epektibo ini puon Hulyo 18.
Sa bagong umento, an daily minimum wage sa NCR an mahalangkaw gikan sa P645 pasiring P695 para sa non-agriculture sector, asin gikan sa P608 pasiring P658 para sa agriculture, retail asin service establishments na may 15 o mas diit na empleyado, asin manufacturing firms na may mas hibaba sa 10 regular workers.
Afuera sa minimum wage earners na pigkarkulong nasa 5 milyon, sinabi ni Laguesma na pwedesir makinabang man an nasa 8 milyong obrero na nagsasahod nin dakol pa sa minimum.
Pigtutugutan man na maghagad nin exemption sa umento an saradit na negosyo na may dae malagpas sa 10 empleyado asin mga kumpanyang naapektaran kan kalamidad o krisis. Dae man saklaw kan minimum wage law an mga rehistradong Barangay Micro Business Enterprises.
