LEGAZPI CITY-Pinayuhan kan Department of Labor and Employment (Dole) an mga employers sa tamang pasahod sa saindang mga empleyado sa duwang holiday ngonian na bulan kan Agosto.
Sa maabot na Agosto 21, idineklara ni President Ferdinand Marcos Jr. an Ninoy Aquino Day na sarong special nonworking day ngani i-selebrar an martyrdom kan namaaram na si Senator Benigno Aquino Jr.
Sa advisory kan ahensya, ipapaotob sa Agosto 21 an “no work, no pay” policy.
An sisay man na empleyado na malaog sa Agosto 21, mababayadan nin dagdag na 30 porsyento sa saindang basic wage sa laog nin walong oras.
Magkakaigwa sana nin dagdag na 30 percent sa kada oras na sahod enkaso maglagpas nin walong oras an pagtatrabaho kan sarong empleyado.
Enkaso an empleyado nasakto sa aldaw kan saiyang pagpapahingalo, asin siya an pinalaog man liwat, mababayadan ini nin 50 percent kan saiyang basic wage sa laog kan walong oras asin dagdag na 30 percent sa kada oras enkaso maglagpas ini nin walong oras.
Mantang sa Agosto 31, pigseselebrar an National Heroes’ Day, idineklara man ini bilang regular holiday.
Kun saen an empleyado na dai naglaog sa trabaho, mababayadan nin bilog kan saiyang sahod asin enkaso maglaog ini sa aldaw na ini, magigin doble o makakaresibe an sarong empleyado nin 200 percent sa laog nin walong oras kan saiyang trabaho.
Magkakaigwa man nin dagdag na 30 percent sa aldawang sahod kaini enkaso maglagpas nin walong oras an trabaho.
