Wara na nin plano pa an Department of Labor and Employment na haharangon an pigbubusol na dagdag sahod sa Kongreso.
Ipinaluwas ni Labor Secretary Bienvenido Laguesma an pahayag makalihis na kwestiyonon kan Makabayan bloc an outdated na basehan kan Regional Tripartite Wages and Productivity Boards para sa pagdadagdag nin sahod.
Sa pagdangog kaya kan Kamara, nagluwas na an datos pa kan taong 2021 an piggagamit kan board para sa pag-compute nin dagdag sahod kan mga obrero.
Kwenistiyon ini ni Alliance of Concerned Teachers Party List Representative France Castro huli ta harayo na an poverty threshold kan taong 2021 kumpara ngunyang 2024 huli sa mahal kan presyo nin barakalon.
Sinegundahan man iyan ni Gabriela Party List Representative Arlene Brosas na nagsabing nakalaag sa konstitusyon an pagtatao nin “living wage” sa mga obrero kung kaya kaipohan na mapalangkaw na an sahod sa Pilipinas.
Sa ngunyan aprobado na sa Senado an P100 na dagdag sahod sa mga empleyado mantang ipigbubusol pa sa Kamara an P150 hasta P750 na wage increase sa bilog na Pilipinas.
