Nilinaw kan Department of Justice (DOJ) na wara ining naresibe na opisyal na recantation o pagbawi kan testimoniya ni dating Department of Public Works and Highways (DPWH) Bulacan District Engineer Henry Alcantara hale sa saiyang mga nagin rebelasyon sa hearing kan Senate Blue Ribbon Committee kan Setyembre 2025.
Segun ki Justice Spokesperson Atty. Polo Martinez, wara sindang naresibe na official recantation, ini man an sa paagi kan verbal o written.
Ginibo kan DOJ official ang paglilinaw kan mahapot mapadapit sa report na nagsunad suboot si Alcantara kan saiyang counter-affidavit na may kinaaraman sa mga reklamong isinunad kan National Bureau of Investigation laban saiya asin iba pang DPWH officials, kabale sinda Brice Hernandez asin Jaypee Mendoza, katakod sa suboot kickback schemes sa maanomaliyang flood control project sa Bulacan.
Nakasaad suboot sa counter-affidavit ni Alcantara na warang ebidensya na pinaburan niya an sisay man na kontraktor o indibidwal asin wara suboot na testigo na nagtao siya nin iregular na bayad kaya ikinatwiran niyang warang bastanteng ebidensya nganing i-convict siya.
Sinabi man suboot ni Alcantara na ang saiyang mga subordinate ang nagsagibo asin nagtago nin mga aksyong sinda mismo an naggibo.
Kun magigiromdomang naenot nang ibinuyagyag ni Alcantara sa Senate hearing na sinda Hernandez asin Mendoza ang nasa likod suboot kan kickback scheme.
Pigtuga man ni Alcantara na kaiba niya si DPWH USec. Roberto Bernardo sa pagtao nin komisyon hale sa flood control projects sa lado ninda Senator Jinggoy Estrada, Sen. Joel Villanueva, dating Senator Bong Revilla, Jr., dating Ako Bicol Rep. Elizaldy Co, asin dating Caloocan Representative Mitch Cajayon, bagay na naenot na man na pinahimutikan kan mga nasabing lehislador.
