Kinumpirmar kan Department of Justice na igwa na ining kapot na mga impormasyon nganing madakop sinda former Bureau of Corrections Chief Gerald Bantag, former Presidential Spokesperson Harry Roque asin iba pang mga pugante.
Ini mismo an ginibong pagsyerto kan nasabing kagawaran kun saen saindang pigtatrabaho an mga impormasyon nindang nakuwa.
Ipighayag kan presenteng tagapagtaram kan Department of Justice na si Assistant Secretary Mico Clavano na plano nindang madakop na an mga puganteng pirit pigtatakasan an ley.
Alagad suboot bako porket an nabanggit na mga pugante an uminabot na sa isyung pambansa, makaseseguro man suboot an publiko na dae kaini pigbabalewala an iba pang mga inibidwal na igwang mga kasong kriminal sa Pilipinas.
Mientrastanto, tinawan doon man ni Justice Spokesperson Mico Clavano na wara daa sindang pigsunusod na numero sa kun siisay an masunod kaining dadakupon.
Paglilinaw niya, kun sisay na an posibleng maarestar an sainda na ining gigibuhon nganing madakop an dapat panimbagon sa ley.
Wara suboot sindang target na partikular na tawo asin magin sa oras o petsa kan pagdakop an dae man subot ninda piggigibuhan nin pagkakasunod-sunod.
An gibubon suboot kan kagawaran an makapagkolekta nin mas kadakol na ‘intelligence’ asin madakop pa maski nin sabay-sabay an mga puganteng nagtatago sa ley.
Si dating Bureau of Corrections Chief Gerald Bantag an presenteng pighahanap pa kan mga otoridad huli sa mga kasong may kinaaraman sa paggadan o murder.
Pigtuturo kaya siyang ‘mastermind’ sa likod kan paggadan sa mamamahayag na si Percival ‘Percy Lapid’ Mabasa kan taong 2022.
Mantang si Atty. Harry Roque man an nasa luwas kan nacion, partikular na sa The Hague Netherlands para sa saiyang aplikasyon nin Asylum.
Ini an kasabay kan saiyang mga pigkakahampang na kaso mapadapit sa pagigin imbwelto man suboot sa illegal na operasyon kan POGO sa nacion.
