Sinabi ni Ombudsman Jesus Crispin Remulla na an Department of Justice (DOJ) naggugol nin 43 na bulan sa pagbilog kan inapod niyang “airtight” na kaso laban sa gaming tycoon na si Charlie “Atong” Ang katakod kan pagkawara kan mga sabungero.
Kasabay kaini, tinuyaw niya an Senado huli ta dae suboot sineryoso an kaso.
Sa saiyang programa, inako ni Remulla, na dating DOJ secretary, an mga angat na pigkahampang kan mga prosecutor, kabali na an kawaran nin kooperasyon kan nagkapira sa mga pamilya kan mga biktima, na suboot bukas sa sarong posibleng areglo.
Magigirumduman na nahahampang si Ang sa kasong kidnapping homicide, kidnapping asin serious illegal detention sa mga nawawarang sabungero makalihis na magluwas nin warrant laban saiya asin iba pang imbwelto.
Segun ki Remulla, dakul na taon na nagtenir na cold case an nasambitang kaso huli ta diit sana an gustong magbusol kaini, urog nang imbwelto an kaso sa mga high-profile personalities.
Pigtuyaw man niya an Senate Committee on Public Order and Dangerous Drugs, na pinangenotan ni Sen. Ronald ‘Bato’ dela Rosa, na nagkondusir nin imbestigasyon kan 2022, asin sinabi niyang dae nag-abante an Senate inquiry.
Sa ibong kan mga angat, sinabi ni Remulla na napiritan an DOJ na maghiro susog sa parens patriae principle, na nagtatao nin kapangyarihan sa estado bilang protector kan namamanwaan sa ibong kan dai na nagkokooperar an pamilya kan nagkapirang biktima.
Pirang bulan makalihis na maghale si Remulla sa DOJ, an mga state prosecutors nagrekomendar kan pagsangat nin 10 counts of kidnapping with homicide laban ki Ang asin iba pa, siring man an 16 counts of kidnapping with serious illegal detention.
 spent 43 months building what he called an “airtight” case against gaming tycoon Charlie “Atong” Ang in connection with the disappearance of the sabungero.){kind=link}