LEGAZPI CITY — Pinahimutikan ni Department of Health Secretary Paulyn Ubial an kabilugang 59 kaso nin pagkagadan sa evacuation centers sa Iligan City kun saen paramientras na nagtetenir an mga resident-evacuees hale sa Marawi City.
Segun ki Ubial, an impormasyon na hale sa ibang media reports na nagpahayag kan numero kan mga nagadan an anas sala asin dae suboot siyang nasambitan na siring na numero.
Ni-review suboot niya an video asin malinaw na saiyang sinabi na warang namatay sa evacuation centers.
Pigtutukoy kan sekretaryo an video kan press briefing sa ASEAN Dengue Day na isinagibo sa Legazpi City kan Hunyo 15.
Inako man kaini na an saiyang nasambitan an numero kan nagadan sa luwas kan evacuation centers o sa mga ospital kun saen dinara an mga evacuees para sa medikal na atensyon na nag-abot sana sa 19.
An rason man suboot kan pagkagadan kan iba an huli sa namamateang kondisyon kan mga pasyente siring na sana kan cancer na nagsasairarom sa dialysis treatment.
Apwera sa 19 na nagadan, may apat na iba pang kaso na padagos nindang pigtsi-check ngane na maaraman an rason kan pagkagadan.
Dugang pa kan health chief, itinaas pa suboot niya an saiyang kamot bilang pagpapahiling kan numero kan nagadan.
Bukas man si Ubial na ipahiling an video kan kabilugang press conference ngane na maprobaran na dae niya sinabi an suboot 59 kaso kan pagkagadan.
