Nakaalerto ngunyan an Department of Health (DOH) sa piglalaomang paghalangkaw kan kaso nin leptospirosis sa nacion.
Ini kasunod kan mga padagos na pag-uran na nagkawsa nin mga pagbaha huli kan magkakasunod na bagyo asin habagat kan mga nakaaging semana.
Sa datos kan DOH, nakapagrehistro na nin 3,037 kaso nin leptospirosis puon Enero 1 sagkod Hulyo 19 kan presenteng taon.
Sa nasabing helang, labi 1,000 digdi an nairehistro puon Hunyo 8, sarong semana makalihis ideklara kan state weather bureau an panahon kan tag-uran sa nacion kan Hunyo 2.
Puon man kan Hunyo 13 sagkod 31, nakapagrehistro an ahensya nin 569 na kaso nin lestospirosis sa mga ospital kan DOH.
Katakod kaini, liwat na nagpagiromdom an ahensya sa publiko na nakakagadan an nasabing helang kaya dapat ining aksyunan urog na kun lumusong sa tubig baha.
Abiso kan DOH na dapat maghugas nin lawas kun lumusong sa baha, bantayan an sadiri para sa posibleng mamatean na sintomas, magkonsulta sa doktor kun malusong sa baha maski warang sintomas asin mag-inom nin bulong kontra sa helang basado sa nireseta kan doktor.
