LEGAZPI CITY — Nagpatanid an Departamento de salud (DOH) sa mga nagpaplano nin outing ngunyan na summer season.
Segun ki Health Education and Promotional Officer Noemi Bron, maski pa mawot na mag-enjoy, dae man giraray paglingawan na dakol an makukuwang helang kasabay kan tag-init siring na sana kan food poisoning, Diarrhea, sunburn asin iba pa.
Katakod kaini, pighayag kan opisyal na kinakaipuhan na lutuon nin marhay an mga pagkakan huli ta mas madali ining maraot ngunyan na mainit an panahon.
Makakatabang man suboot na ilaag ini sa refrigerator o initon giraray antes na magkakan.
Dugang pa ni Bron na importante man an paghuhugas nin kamot antes asin pagkatapos na magpreparar kan mga kakaunon.
Mientrastanto, dapat man suboot na bantaan an mga kaakian kun magpapasiring sa mga swimming pool ngani na maibitaran an anuman na aksidente.
Pighayag man kan opisyal na kinakaipuhan na hilingon an kondisyon kan mga behikulo kun mapasiring sa hararyon lugar ngani na dae mapindiyente an pigmamawot na maugmang summer outing urog na ngunyan na kadakol na nangyayaring mga aksidente sa tinampo.
