LEGAZPI CITY – Pig-enganyar kan Department of Health Bicol an publiko na magdonar nin dugo huli sa naghahalangkaw na demand kaini.
Segun ki DOH Bicol Donor Recruitment Officer Nurse II Nicole M. Bejo sa intrevista kan Bombo Radyo Legazpi na 35 days an expiration kan mga dugo na pigdodonar kun kaya importante an urualdaw na nagkakaigwa nin blood donation.
Padagos man suboot an saindang pagsasagibo nin mobile blood donation activity asin pig-enganyar an saindang mga partner na maipapadagos an pagsasagibo kan mga siring kaining aktibidad nganing mamantenir an maray na supply kan dugo.
Poon kan nakalihis na bulan kan Marso hasta ngonian na semana an may bastante pang suppy nin dugo sa saindang bloodbank.
Sinabi pa kan opisyal na halangkaw an demand sa dugo ngonian huli ta dakol an nagkakahelang asin dakol na mga pasyente an nagsasairarom sa dialysis, mga cancer patient na nangangaipuhan nin dugo asin kadakol pang medikal na atensyon na kaipuhan na salinan nin dugo.
Naghalangkaw man an demand sa dugo huli sa pagsipa kan mga kaso nin dengue sa Pilipinas.
Nakiki-olay man sinda sa mga kandidato ngonian na 2025 midterm election na dae paggamiton an mga pigsasagibo nindang blood donation activity sa saindang mga kampanya.
Nangangapodan man ini sa publiko na magtabang sa paagi kan pagdonar nin dugo nganing mapalawig pa an buhay kan mga pasyenteng labing nangangaipuhan kaini.
