LEGAZPI CITY – Presenteng nakabandera an code white alert status an Department of Health Bicol ngunyan na holiday season.
Segun kay DOH Bicol Center for Health Development Regional Program Manager, Violence and Injury Prevention Program Julie Ann Legaspi Granadino sa intrevista kan Bombo Radyo Legazpi na hasta sa Enero 2025 an pagbandera kan nasambitang alert status para sa enterong hospital sa rehiyon nganing maasigurar na supesyente an mga personahe nganing makapagtaong asistensyang medikal sa publiko.
Nasa ikaapat na aldaw na sinda nin monitoring asin hasta sa ngunyan wara pang naitatala na firecracker related incidents sa Bicol mantang nagbaba an bilang kan mga naputukan ngunyan na mapasko kompara kan nakaaging taon.
Kamawotan kan saindang departamento na wara nang maireport na naputukan hasta sa matapos an pagselebrar nin pasko.
Pigtaram man kan opisyal na padagos man an pagbabantay ninda kaibahan an Philippine National Police Bicol nganing masawata an nagpapabakal nin mga ilegal na paputok sa rehiyon.
Abiso kaini sa publiko na dae na pagtangkilikon an paggamit nin paputok asin dae na pagpuruton an mga napaso o dae man nagputok nin huli ta may tyansa ining sumabog man gilayun na posibleng magkawsa sa pagkalugad asin pagkawara kan saindang kamot.
Pangapodan man kaini sa mga magurang na syertuhon na dae maggamit nin paputok an saindang mga aki nin huli ta pababa ki pababa an age group kan mga napuputukan.
Pagirumdom ni Granadino sa publiko na pwede man iselebrar an pasko asin bagong taon na dae naggagamit kan mga ipinagbabawal na paputok nin huli igwa man sana nin mga alternatibong paagi nganing maiselebrar ini nin matuninong asin salbado.
