LEGAZPI CITY- Katakod kan pig-aantisiparan na paglaog kan summer season, naglunsar an Department of Health (DOH) Bicol nin catch-up immunization o bakuna para sa tipdas.
Sa intrevista kan Bombo Radyo Legazpi ki Maria June Robles, Nurse 3 kan DOH Bicol, sinabi kaini na obheto kan nasambitan na lakdang kan ahensya na susugon an mga aki na nagpalyar na mapabakunahan kan saindang mga magurang mientras na umboy pa sa edad na 9 sagkod sa 12 bulan.
Sinabi ni Robles na ini kaya an tamang edad para sa pagbakuna sa mga aki bilang immunization kontra sa helang na measles o tipdas.
Para suboot sa mga aki na dae naka-abila kan nasambitan na serbisyo kan ahensya, pwedesir man giraray na magpasiring sa mga health units ngani na makumpleto an bakuna.
Ineksplikar man ni Robles na bako sana sa tipdas ililikay an mga aki alagad siring man sa iba pang helang arog kan bayuko, pneumonia asin rubella.
Haloy na ining ipigsasagibo kan departamento de salud ngani na maprotihiran an mga umboy asin aki sa mga helang na pwedesir na dae pa kayanon kan saindang resistensya.
