LEGAZPI CITY—Pighayag kan Department of Health Bicol Center for Health Development sa kun pano maaraman kun an sarong persona nakakakaeksperyensya nin helang na hypertension asin kun pano ini maibibitaran.
Segun ki Department of Health Bicol Center for Health Development Medical Officer III Dr. Raymond Martin Corpus, enot na digdi an pa-aram kan blood pressure.
Maaaraman na may high blood pressure an sarong indibidwal kun an saiyang blood pressure an mas halangkaw sa 140/90.
Afuera digdi, dakula man nakakakontribuir sa pagkakaigwa nin hypertension an pag-inom nin arak, pagsisigarilyo, obese o may lahi nin high blood.
Dapat man na magkonsulta sa doktor asin sunudon an saindang abiso sa kun ano an dapat na gibohon mapadapit digdi.
Siring man na mag-inom nin maintenance asin dapat na ipagpadagos an pagbulong, huli ta yaon man giraray an huma kan stroke.
Dugang kan opisyal na baguhon an lifestyle siring kan pag-exercise nin maski 30-minuto kada aldaw, mag-diet, ibitaran an pag-inom nin arak asin pagsisigarilyo.
Tinawan-duon man ni Dr. Corpus, na kun may hypertension siertohon na dae na magluwas nin harong sa ibong kan naeeksperyensyahang mainit na panahon nganing maibitaran an ano pa man na peligro sa salud.
