LEGAZPI CITY – Nagpaliwanag an Department of Health Center for Health and Development sa pagkakaiba-iba nin datos na nakakaag sa Daily COVID-19 Updates kan regional office asin ipigpapaluwas na datos kan mga lokal na gobierno.
Susog sa paglilinaw kan DOH-CHD Bicol, hali sa Regional Epidemiology and Surveillance Unit (RESU) an ipigluluwas na datos kan oficina mantang nakadepende man ini sa numero kan mga nagpositibo asin specimen na hiniling hali sa mga COVID-19 laboratory.
Kaibanan man sa nasabing report an mga nagadan asin narahay na sa COVID-19 hali sa mga Provincial/City/Municipal/Hospital Epidemiology and Surveillance Unit (ESU).
Dai pa man suboot digdi kaibanan an mga datos na dai nairereport kan mga LGU sa RESU na tipikal na rason kan pagkakaiba-iba kan datos.
Inasegurar man kan oficina na nagsasagibo na nin data reconciliation kaibanan an mga LGU na pinatanidan na tulos ireport an mga nairerehistrong recoveries asin deaths para magtugma an mga datos.
Idugang pa digdi an aro-aldaw man na verification kan RESU sa mga local ESUs.
Magigirumduman na enot nang ipighayag kan provincia kan Sorsogon an nasabing lakdang huli sa pagkakaiba kan numero kan COVID-deaths kan regional asin provincial office.
