LEGAZPI CITY-Naghahanap pa nin solusyon an Department of Energy (DOE) ngani na masimbagan an problema sa suplay nin kuryente sa banwaan ni Rapu-Rapu nagkapirang oras na sana antes na liwat na putolan nin suplay an lugar.
Mayo 15 kan enot na i-shutdown an suplay sa lugar huli sa nasa P28 milyon pang bill na dae nababayadan alagad Mayo 18 kan ibalik liwat ini asin tinawanan nin 48 oras nganing makahanap nin solusyon antes na putolan liwat atdyan na alas 12 nin pagkaudto.
Sa intrevista kan Bombo Radyo Legazpi kay DOE Electric Power Industry Management Bureau Director Mario Marasigan, nagkapirang oras na sana an pigbibilang antes na putolan liwat nin kuryente kan Albay Power and Energy Corporation (APEC) an lugar alagad dae pa nakakabilog nin plano asin desisyon an ahensya ngani na makapagbayad kan dakulang bill kan mga konsumidores.
Hinali na kan opisyal an suhestiyon na ibalik sana an suplay sa mga tultol na nagbabayad nin bill huli ta per station an pagbayad kan kuryente asin dae man pwedesir na pilion sana an mga susuplayan.
Inasegurar kan opisyal na piggigibo man kan DOE an gabos ngani na matabangan an mga konsumidor sa lugar alagad nag-abiso man ini sa mga residentes na maging responsable sa pagbayad kan pigkokonsumo ngani na dae magkaproblema.
Mientras tanto, nilinaw man ni Marasigan na lehitimo an pagputol kan APEC sa suplay nin kuryente sa banwaan huli ta nakipagkoordinar naman ini sa ma ahensya kan gobyerno asin lokal na opisyal mantang taong 2018 pa an mga dae nabayadan na bill.
