LEGAZPI CITY – Nagtatarabangan na an Department of Energy (DOE), National Power Corporation (Napocor), Albay Power and Energy Corporation (APEC) asin iba pang stakeholders ngani na masulusyuan an problema sa Rapu-Rapu Albay.
Sa intrevista kan Bombo Radyo Legazpi ki 1st District BM Vic Ziga Jr., chairman kan Committee on Energy kan Sangguniang Panlalawigan kan Albay, pag-oolayan pa kun anong pwedeng ipresentar na resolusyon ngani na masulusyunan an presenteng sitwasyon sa banwaan.
Kapag wara pa nin nabilog na agreement asin resolusyon sa pagultangan kan APEC asin kan Rapu-Rapu, siertong puputulon na naman an serbisyo kan kuryente sa bilog na Isla.
Alagad tinawang-duon ni Ziga na an anuman na negosyo an kaipuhan nin collection kaya dapat igwa nin disiplina an mga consumidores sa saindang mga obligasyon.
Naglalaom man ini na maliwanagan an mga consumidores na an nagkakargo kan mga dae nagbabayad nin tama sa bill sa kuryente, iyo an mga regular na nagbabayad.
Sa presente nag-iisip an DOE asin iba pang stakeholders nin win-win solution sa kun ano an magigin sitwasyon kan Rapu-Rapu ngonyan na aldaw.
