LEGAZPI CITY — Padagos na pighahanap ngunyan kan mga otoridadad an limang armadong kalalakihan na suspek sa pangha-aharass sa Detachment Camp kan Charlie Company kan 2nd Infantry Battalion, 9th Infantry Brigade kan Philippine Army na nakabase sa Barangay Togoron, banwaan kan Monreal, Masbate.
Enot kaini, ipinaabot ni 1st Lt. April John Del Rosario, 28-anyos asin Commanding Officer kan nasambitan na batalyon an impormasyon sa hepatura kan Monreal Municipal Police dapit sa nangyaring harassment sa saindang detachment.
Segun sa opisyal, pinagkakarukulong nasa limang armadong kalalakihan an nagsakyada sa sainda sa pangengenot kan sarong Eleazar Ontog alyas Ka Randy.
Nagdurarar sana nin sarong minuto an ribayan nin putok asin tulos na nagdulag an mga suspek.
Wara man na nairehistrong casualty sa tropa kan gobyerno mantang narekober sa pinangyarihan kan insidente an nasa poco mas o menos 100 pidaso nin empty shells kan manlaen laen kalibre nin badil.
Sa presente, nagpapadagos pa an ipigsasagibong imbestigasyon kan mga otoridad ngani na maaraman an pagkakabisto kan apat pang mga suspetsado mantang ipighahanda na an kasong isasangat kontra sa mga ini.
