LEGAZPI CITY – Nagpatanid an sarong dermatologist mapadapit sa Acne Vulgaris asin an kawsa kaini kun pano pigtatamaan an sarong tawo.
Segun ki Dr. Jo Faustine Manzano sa intrevista kan Bombo Radyo Legazpi na an Acne Vulgaris o bisto sa apod na pimple o tigyawat an komon sa presenteng panahon huli ta maski anong edad an pwedesir tamaan.
Pwedesir na kawsa suboot an tigyawat nin stress, kulang sa turog, mga pagkaon, asin an hormones urog na kun nagsasairarom sa puberty an sarong tawo.
Importante man an tamang pagmantenir kan lifestyle huli ta maski anong bulong an gamiton, magkakaigwa man giraray nin tyansa na magbalik an mga tigyawat kun bako tama an pag-ataman sa salud.
Pigtaram pa kan nasabing espesyalista na nakakatabang man kun tatao i-manehar kan publiko an saindang mga stress asin sleep schedule huli ta saro an mga ini sa marikas na maka-trigger nin tigyawat.
Kun mainom nin bulong nganing mapugulan an pagtubo kan tigyawat, pilion suboot an itataong reseta kan mga espesyalista nganing malikayan an maraot na epekto sa hawak.
Piggigibo man kan iba nganing matanggal sana an pamumula kan saindang tigyawat iyo an pagbubugtak nin yelo alagad bako ini otorisadong paagi sa pagbulong kaini.
Pagirumdom ni Dr. Manzano sa publiko na mabalik giraray an pagkakaigwa nin tigyawat kun bako maray an pangangataman sa salud kun kaya kaipuhan an tamang disiplina sa sadiri.
