LEGAZPI CITY — Dae pa makapanubod hasta sa ngunyan an pamilya kan sarong mekaniko sa pagkawara kaini makalihis na maghugot.
Nadukayan na wara nang buhay kan saiyang ama an bitima na si Jerome Reonal sa laog kan kwarto kaini sa saindang residensya sa Gawad Kalinga, Binitayan, Relocation Site sa banwaan kan Daraga, Albay.
Segun ki Pol. Supt. El Cid Roldan, hepe kan Daraga Municipal Police, haros magkakasunod an nairerehistrong mga suicide incident sa banwaan sa mga nakalihis na semana.
Pigtuturo man kan opisyal na depresyon an rason kan pagbawi kan biktima sa sadiri kaining buhay.
Pagbuyagyag kan opisyal, base sa saindang pagkikipag-olay sa mga amigo ni Reonal, napag-araman na naga-istorya ini kan mga nakalihis an aldaw dapit sa pagkapungaw sa ka-live in partner asin sa 3-anyos na aki na nasa Manila ngunyan.
Ini man an pighihiling na rason kan mga kapulisan sa paghugot kan nasambitan na biktima.
Dugang pa ni Roldan na tultol na tawo si Reonal asin dae ini naiimbwelto sa anuman na kariribukan kun kaya dae pinensar kan pamilya asin mga amigo kaini na magigibo an pagbawi kaini sa sadiring buhay.
