LEGAZPI CITY — Tinawan duon kan Department of Education (DepEd) Regional office 5 na wara sindang aram sa procurement kan kontrobersyal na P8.1 billion barangay health center project kan Department of Health (DoH).
Segun ki DepEd Bicol Dir. Ramon Fiel Abcede, recipient sana an ahensya asin wara sindang kinaaraman sa procurement kaini.
Alagad segun sa opisyal, igwa sinda ngunyan na kapot na mga datos kun pirang health stations sana an natapos asin kun pira an kinanselar o dae napuunan an pagpapatindog.
Kinumpirmar man ni Abcede an impormasyon na igwang mga school heads na warang aram na gigibuhon na site kan proyekto an napapamayuhan nindang eskwelahan maski pa igwang validation na nangyari.
Dugang pa kan dorektor na dae muna ninda hihiruon an nasambitan na mga health stations asin imamantenir kun ano an presenteng itsura kan mga ini.
Mientrastanto, pigduon pa kaini na maski an DepEd an dae man aram kun nabayadan na an nasambitan na mga proyekto asin kun papano an ginibong procurement kan mga ini.
