LEGAZPI CITY — Nagkaigwa nin pag-oolay an mga personahes kan Department of Education kaibanan na si Asec. Revsee Escobedo ngane na maresolberan an mga pigkakahampang na problema kan ahensya.
Nagkapira sa problema ngunyan iyo an kakulangan sa textbooks, classrooms, pasilidad, ekipahes asin an pagkokonstruhir kan mga naraot kan bagyong Nina kan nakalihis na taon.
Tinukar sa presscon ni Senior High School focal person Leila Lorico an duwang senior high school track na pig-oopresir sa nagkapira sanang eskwelahan.
Plano na suboot ini kan rehiyon na magkaigwa nin maski sarong eskwelahan na ma-opresir kan sports asin arts and designs track.
Pinili sana an eskwelahan na kwalipikado digdi na may tamang pasilidad.
Para sa sports track, pig-ooffer ini sa Albay, Camarines Norte, Camarines Sur, Masbate, Naga City asin Sorsogon na may totalmenteng 157 enrollees.
Uminabot man sa 314 an enrollees kan arts and designs na igwa sa mga eskwelahan sa Albay, Camarines Norte, Camarines Sur, Catanduanes, Ligao City, Masbate, Naga City, Sorsogon, asin Tabaco City.
Mientras tanto, nagigibo na nin health interventions an DepEd Bicol ngane masiertong salbado an mga aki partikular na sa inumon na tubig kun saen nagkokondusir sinda nin potability testing sa gabos na eskwelahan.
Dae man pigpapabayaan na painumon an mga aki nin tubig hale sa source na dae pa natetest.
