LEGAZPI CITY – Liwat na nagpagirumdom an Department of Education (DepEd) Bicol sa mga schools administrators na gibuhong simple asin makahulugan an graduation rites.
Base sa school calendar kan DepEd, ikokondusir an graduation ceremonies sa mga pampublikong eskwelahan sa Abril 7.
Sa ipinaluwas na pahayag kan departamento, inabisuhan ni DepEd-Bicol regional director Ramon Fiel Abcede na gibuhon an seremonya na dae naggagastos nin maray, halion an mga extravagant attire asin mahal na venue.
Sa irarom kan “No Collection” policy kan DepEd, sinabi ni Abcede na dae dapat nin mandatory collection kan mga bayadan na katakod kan graduation o moving-up ceremonies.
Apwera pa sa unnecessary payment collection, ipigduon pa kan director na dae dapat magpautob an mga eskwelahan nin non-academic requirements sa mga magradwar na estudyante partikular na an mga madugang sa kadifisilan kan mga estudyante.
Nagbaba man nin direktiba si Abcede sa mga pamayo kan eskwelahan na tulos magtao kan ‘certificate of graduation’ o ‘certificate of completion’ sa mga estudyante durante kan seremonya.
Ipigduon pa kan opisyal na dae na kaipuhan pa an mga school clearances.
Sa irarom kan Department Order No. 08 series of 2017, ipigbabawal an mandatory charges sa graduation asin completion rites huli ta kasabay na an mga gastos sa irarom kan “Schools Maintenance and Other Operating Expenses” kan 2017 budget.
Alagad, nakapalaman man sa kasuguan na pigtutugutan an mga donasyon asin pwedesir akuon an mga kontribusyon alagad sa complete voluntary basis sana.
