LEGAZPI CITY — Nagbilog an Department of Education (DepEd) Bicol nin “safety nets” tangarig preventaran an anumang kaso nin tigdas o measles sa sarong semanang Palarong Bicol na nakatalaan na punan sa Pebrero 24 sa provincia kan Masbate.
Sinabi ni DepEd Regional Director Gilbert Sadsad sa sarong press conference na nagibo na nin mga esfuersos tanganing masierto an mabaskog asin salbadong palibot para sa mga atleta asin iba pang partisipantes durante kan event.
Segun ki Sadsad na tangarig preventaran an measles, sinugo an kada medical officer kan divisions na i-check an mga atleta antes na magpasiring sa Masbate.
Kun may mga sintomas asin kalintura, mas maray na dae na iiba pa.
Durante kan aktibidad, magkakaigwa man an kada billeting school nin designated quarantine area para sa pigsususpetsaran na kaso nin tigdas kun sain duty 24/7 an mga nurse asin medical officers.
Inabisuhan man kan DepEd official an kada atleta na mag-report tulos sa school o billeting school makalihis an kompetisyon tangarig maibitaran an pagkakaigwa nin anumang airborne diseases asin pirming hugasan an mga kamot.
Dugang pa ni Sadsad, makalihis an Palaro, ika-quarantine sa laog nin limang aldaw an mga partisipantes kun sain itsi-check asin oobserbahan an health status.
