DepEd Albay, nasa preparedness status na katakod kan pigbabantayang si bagyong “Fung-wong”

LEGAZPI CITY – Nasa preparedness status na an Department of Education Albay Schools Division Office bilang preparasyon sa pig-aantisiparang epekto ni bagyong “Fung-wong”.

Segun ki Schools Division Office Albay Spokesperson Froilan Tena sa intrevista kan Bombo Radyo Legazpi na maski magin typhoon o super typhoon an nasabing raot nin panahon ates ini maka-apektar sa rehiyon Bicol an kaipuhan man liwat magpreparar nganing masyertong salbado an dokumento kan mga estudyante asin iba pang gamit sa mga eskwelahan.

Importante suboot an pagbubugtak kaini sa salbadong lugar kan mga dokumento huli ta digdi nahihiling kun naka-enroll o nakapagtapos an estudyante sa sarong eskwelahan.

Dugang pa niya na afuera sa mga dokumento an kaipuhan man i-preparar an mga classroom asin pagbubugtak kan mga school materials sa salbadong lugar urog na kun gagamiton an mga ini bilang kadugangang evacuation centers.

Pigtaram pa kan opisyal na nasa pagultangan na kan pamayo kan mga eskwelahan asin lokal na gobierno an koordinasyon mapadapit sa kun pira sa mga classroom an gigibuhon na evacuation centers enkaso mamatean na an epekto kan raot nin panahon sa provincia.

Pagkatapos suboot na mangrapado an sarong raot nin panahon an nagsasagibo an kada school heads nin assessment sa paagi kan Rapid Assessment of Damages Report nganing hilingon kun ano an mga danyos na pigsapar kan eskwelahan.

Madurar man an saindang preparedness status sagkod sa ideklara kan state weather bureau na wara nang epekto sa provincia an sarong raot nin panahon mantang nasa Lokal na gobierno na an magigin hurisdiksyon mapadapit sa suspensyon kan klase.

Pagirumdom ni Tena sa gabos na magpoon nang magpreparar asin ibugtak an saindang mga gamit sa ligtas na lugar asin ihanda na an gabos na kakaipuhanon antes pa man mamatean an epekto kan pigbabantayang raot nin panahon.