LEGAZPI CITY-Nakatakdang ikondusir kan Department of Education (DepEd) Albay an National Simultaneous School Safety Drill sa Setyembre 3 bilang paghahanda kan mga eskwelahan sa anumang posibleng peligro sa mga estudyante asin paratukdo.
Segun kay DepEd Albay Spokesperson Froilan Tena, sa intrevista kan Bombo Radyo Legazpi na ibinababa na an kasuguan sa lambang eskwelahan asin ngonian pigtutukan ninda an napiling eskwelahan na ipapahiling sa central office para sa simultaneous coverage sa aldaw na ini.
Napili para sa rehiyong bikol an San Fernando National High School sa Sto. Domingo, Albay kun sain ikokondusir an nasabing aktibidad.
Gaganapon man ini bandang alas 9:30 nin aga asin isasagibo ini ngani magin preparado an mga estudyante, mga paratukdo, magin an mga magurang sa anumang posibilidad nin peligro sa mga eskwelahan.
Dagdag pa ni Tena na na-briefing na an mga paratukdo para sa isasagibong drill ngani magin preparado sinda sa mga mangyayari.
Sinabi man kan opisyal na saro ining pag-aandam, mantang wara pang nangyayari, ngani dai na ini ikabigla kan mga estudyante asin paratukdo asin ngani aram na ninda an saindang mga gigibohon sa oras kan anumang peligro sa eskwelahan.
