Inihayag kan Department of Tourism (DOT) an plano na gibuhong ”Muslim-friendly” an sikat na Boracay Island sa kamawotan na maka-inganyar nin mas kadakol na Muslim na turista.
Idineklarar ni DOT Secretary Christina Garcia-Frasco an plano kan ahensya para sa sarong ”Muslim-friendly Boracay” sa pabubukas kan tulong araw na Salaam: The Halal Travel and Trade Expo kan Hunyo 14.
Segun ki DOT Undersecretary Myra Paz Valderrosa-Abubakar, an plano na gibuhong Muslim-friendly destination an Boracay, nabuksan sa meeting kan ahensya, mga opisyal kan lokal na gobierno kan Malay na nagho-host sa sikat na white-sand beach spot asin kan mga ambassador kan Malaysia asin Brunei Darussalam duwang bulan na an nakakalihis.
Afuera sa nasabing propuesto, sinabi ni Frasco na an ahensya an padagos na nagsusuporta sa mga inisyatiba kan Bangsamor Autonomous Region in Muslim Mindanao ngani na i-welcome an mas kadakol na Muslim travellers.
Inomaw man kan opisyal an Quezon City sa pagigin ”saro sa pinaka-Muslim-friendly na lokal na gobierno sa Metro Manila,” na may populasyon na hasta 50,000 Muslim siringman an pagtitindog nin 45 mosque.
