LEGAZPI CITY – Nakahanda na an Department of Social Welfare and Development sa pagtatao nin asistensya sa mga posibleng maapektaran kan Bagyong Aghon sa rehiyong Bicol.
Sa intrevista kan Bombo Radyo Legazpi kay Claudio Villareal Jr. an Officer-in-Charge kan Disaster Response Management Division kan Department of Social Welfare and Development Bicol, maski pa naenot ng sinabi kan state weather bureau na dae nin matinding epekto sa rehiyon an bagyo, magdadara man giraray ini nin mga pag-uran na posibleng magkawsa ninm mga pagbaha asin pagrasay nin daga.
Huli digdi nakaalerto na an mga opisina kan ahensya na nakikipagtabangan sa mga lokal na gobyerno sa pagtatao nin ayuda sa mga residenteng posibleng maapektaran.
Segun kay Villareal, igwa an ahensya nin nasa P38.8 milyon na kantidad nin standby funds na pwedeng magamit para sa pananao nin tabang sa mga residentes.
Igwa man nin mga family food packs na nakahanda ng itao sa mga local government units na magpapaabot nin request hali sa ahensya.
Abiso na sana kan opisyal sa mga residentes na mag-antabay sa mga abisong ipapaluwas kan mga opisyal asin ahensya kan gobyerno asin magdoble ingat ngunyan na may bagyo.
