Pighayag kan Department of Agriculture (DA) na pinag-aadalan an paglangkaw nin taripa sa artificial sugars bilang dugang na lakdang ngani napakusugon an demand sa lokal na asukar.
Enot na man na nagdesisyon an ahensya na palawigon an ban sa sugar importation hasta Disyembre 2026 ngani na protehiran an lokal na mga paraoma asin industriya kan asukar.
Segun sa Department of Agriculture na mas halangkaw an paggamit kan mga imported sweeteners siring kan high-fructose corn syrup na nakaka apektar sa demand kan lokal na tubo.
An posibleng paglangkaw sa taripa an nahihiling na paagi ngani na bawasan an paglaog kan mga synthetic sweeteners sa merkado.
Basado sa datos kan Sugar Regulatory Administration (SRA), nagrarahay na an suplay kan lokal na asukar alagad nagtetenir na agyat an hibabang presyo huli sa kompetisyon hali sa artificial sugars.
Sa presente nagtetenir an halangkaw na presyo kan refined sugar sa merkado, na nag-aabot sa P90–P100 kada kilo rason ngani na pilion kan nagkapirang manufacturers an mas baratong artificial substitutes.
Pigduon kan ahensya na obheto kan lakdang na siertuhon an self-sufficiency kan nacion sa asukar asin mamantenir an ganansya kan mga lokal na paraoma.
