LEGAZPI CITY – Urog pang nadugangan an nairerehistrong kaso kan dengue o helang namakukua sa kagat nin lamok, sa Bicol makalihis sumakat sa 84% increase o nasa 2, 660 na puon Enero 1 hasta Hulyo 13, 2019 na datos kan Department of Health (DOH) Bicol.
Sa intrevista kan Bombo Radyo Legazpi ki DOH Bicol Director Dr. Ernie Vera, suminakat naman sa 30 katawo an nagadan sa nasabing helang hali sa anom na provincia kan rehiyon.
Pinakahalangkaw na kaso sa Camarines Sur sa labi 1, 000 na pigsusundan kan Albay, Sorsogon, Masbate, Catanduanes asin pinakahibaba sa Camarines Norte sa 128 cases.
Maikokonsiderar suboot na komplikado an presenteng datos urog pang inalerto na an mga provincial offices sa posibilidad na magdeklarar nin outbreak sa nagkapirang barangay an Epidemiology Division kan DOH.
Tinawang-duon man kan opisyal na paglimpia sa palibot an pinakadakulang maitatabang kan komunidad sa obhetong mapuho an nasabing helang asin maibitaran an padagos pang paglangkaw kan kaso.
