LEGAZPI CITY — Nagpapadagos an pigigibong lakdang kan Albay Provincial Health Office (PHO) sa pag-ibitar sa padagos pang paglangkaw kan kaso nin dengue sa provincia.
Pagbuyagyag ni Acting Provincial Health Officer Dr. Antonio Ludovice sa intrevista kan Bombo Radyo Legazpi, nagkaigwa nin significanteng paglangkaw sa kaso nin dengue sa nakalihis na limang bulan kan 2019 kumpara sa nakalihis na taon.
Taong 2018 suboot kan labi sa 300 kaso an nairehistro sa kaparehong peryodo kan taon alagad suminakat ini ngunyan sa 679 na kaso kun sain nagtetenir na an ciudad kan Legazpi an may pinakahalangkaw.
Igwa man suboot na nairehistrong 39 na nagpositibo sa dengue sa banwaan kan Guinobatan, siring man sa banwaan kan Tiwi asin Oas.
Napag-araman man na igwang anom nang binawian nin buhay huli sa helang na makukua sa lamok, na hali sa mga banwaan kan Camalig, Oas, Guinobatan, Daraga, Malinao, asin ciudad kan Legazpi.
Mientras tanto, abiso ni Ludovice sa publiko na ugalion an paglilinig sa kapalibutan urog na sa paglaog kan tag-uran tangarig na maibitaran na istaran nin lamok an mga lugar.
