Ipinaliwanag kan kampo ni Vice President Sara Duterte na an desisyon na pag-waive sa cross-examination sa saro sa mga testigo kan House prosecution panel, an huli ta wara man kaipuhan na kontrahon sa testimonya.
Segun ki defense spokesperson at counsel Atty. Michael Poa, dae ninda kinuwestyon an testimonya ni dating government Bank department manager Violeta Constantino, na nagtukar sa pag-encash sa apat na teseke na nagkakantidad nin tig-P125 milyon kan dating Office of the Vice President (OVP) Special Disbursing Officer na si Gina Acosta bilang parte kan pagtukar sa Article I kan impeachment complaint.
Sinabi ni Poa na magiging “petty” sana an dugang na dae man kinakaipuhan na paghahapot huli ta dae man pigku kwestyon kan depensa an pagiging balido kan pag-encash kan mga tseke.
Dugang pa ni Poa na an pagsasaladawan kan mga testigo na “unusual” an cash withdrawals an personal na opinyon sana asin dae makaka apektar sa isyu na pigdadangog kan impeachment court.
Sa naging cross-examination man ki dating Government Bank-DepEd branch manager Nenita Camposano, sinabi ni Poa na obheto sana na linawon kun nata nag-agi sa fire exit an dating DepEd Special Disbursing Officer na si Edward Fajarda makalihis kuwaon an cash, ngani na maibitaran an anuman na salang interpretasyon.
