Pignegaran kan defense team ni Vice President Sara Duterte na nag-walk out an saindang lead counsel na si Atty. Sheila Sison mantang pigsisimbag kan prosecution an hapot ni Senator-Judge Risa Hontiveros sa ika-duwang aldaw kan impeachment trial kan Martes.
Nangyari ini mantang pigsisimbag ni private prosecutor Atty. Amando Ligutan an hapot ni Hontiveros kung maikokunsiderar na impeachable offense an suboot grave threats ni Vice President Duterte kontra ki Presidente Ferdinand Marcos Jr., First Lady Liza Marcos, asin dating House Speaker Martin Romualdez.
Sa tahaw kan simbag ni Ligutan, binanggit kaini na suboot nagibo nin eksena si Atty. Sison makalihis marisa na nagluwas an abogado sa session hall.
Tulos man na nagbalik si Atty. Sison makalihis siyang masita ni Ligutan.
Nilinaw ni defense spokesperson Atty. Michael Poa na dae nag-walk out si Sison kundi nagpasiring sana sa banyo.
Segun ki Poa, normal sana an pagluwas nin madali sa sarong halawig na pagdangog asin sinabing magin siya an nagkapirang beses man na nagluwas sa nasabing paglilitis.
Dugang pa niya na nagbalik tulos si Sison kan madangog an saiyang pangaran asin ipinaliwanag na kaipuhan sana niyang mag-toilet break.
