Guminadan na nin labi 80 katawo an ribayan kan missile asin airstrikes sa pagultangan kan Israel asin Iran.
Segun sa Israeli authorities, tulong katawo an nagadan sa Israel mantang 19 man an nairido sa magkakasunod na pinakawalang missiles kan Iran.
Duwa an nagadan kaiba an 19 nairido sa missile attack kan Iran na nagtama harani sa mga kaharongan sa Rishon Lezion, sa babang parte kan Tel Aviv.
An ikatulong indibidwal an nagadan makalihis mabagsakan nin pidaso nin missile kan Iran sa enot na bugso kan magdamlag na missile strikes. Idineklarang gadan an biktimang babae sa siyudad kan Ramat Gan, na nasa sirangang parte kan Tel Aviv.
Ini-report man kan Iran na nasa 78 katawo na an nagadan sa strikes kan Israel asin 320 an nairido na kadaklan mga sibilyan.
Mientrastanto nagpapadagos an paghahanap sa mga residente na posibleng na-trap sa mga edipisyo sa mga residential area kan Rishon Lezion na tinamaan kan missile strikes kan Iran.
Segun sa National emergency response agency Magen David Adom, matinding nadestroso an pirang mga edipisyo kan nag-abot sinda sa lugar mantang an iba sa mga nairido an na-trap sa mga nagabang edipisyo asin an iba an nahiling na naglalakaw na nairido.
Enot digdi, liwat na nagsiklab an tensyon sa pagultangan kan Iran asin Israel makalihis an sorpresang pag-atake kan Israel kan Biyernes sa nuclear asin military facilities kan Iran na ikinagadan kan nagkapira sa haralangkaw na lider kan nacion, rason kaya nagbalos ini nin missile attack sa Israel.
