Nagsakat na sa 36 an numero kan mga nagadan sa pagrasay kan ga-bulod na basura sa Binaliw Landfill sa Cebu City makalihis marekober an apat pang bangkay.
Segun ki Cebu City Councilor Dave Tumulak, duwang bangkay an narekober mga alas 2:53 nin hapon, mantang an saro pa nakuwa mga alas 3:10 nin hapon kan nakaaging aldaw.
Dai pa madeterminaran an identidad kan apat na biktima.
18 katawo man an nairido sa insidente na tulos man na dinara sa ospital.
Magigirumduman na nangyari an trahedya kan Enero 8, kan pigkakarkulong nasa 20 eskalon nin basura an buminagsak sa nasabing landfill kun sain natakluban an nagkapirang trabahador sa lugar.
Bilang simbag, pigdeklarar kan Cebu City Council an Enero 16 bilang aldaw nin pagluluksa para sa mga biktima asin ibinugtak an syudad sa sa state of calamity, na nagtutugot kan pagpaluwas nin P30 milyon na quick response fund nganing tustusan an mga serbisyo na may kinaaraman sa pagtapok kan basura.
Sinabi kan Prime Integrated Waste Solutions Inc., an operator kan Binaliw landfill, na base sa enot na assessment kan mga opisyales kan ciudad asin eksperto, an pagbagsak an posibleng kawsa kan pinagsararong epekto kan magnitude 6.9 na linog kan Setyembre 2025, an mga aftershock kaini, asin an makusog na uran na dara kan Bagyong Tino.
Idinagdag pa kan kompanya na nagtao na sinda nin tabang pinansyal asin psychosocial support sa mga pamilya kan mga apektadong empleyado, asin sinda man an nagbayad kan mga gastos sa pagbulong kan mga nalugadan, siring man an mga gastos sa burol asin paglubong kan mga nagadan.
