Bako garantiyang epektibong solusyon an death penalty para mawakasan an korapsyon sa nasyon.
Ini an tinawan-doon kan Commission on Human Rights (CHR) sa tahaw kan pigbubusol na propwestong ley sa Kamara de Representantes na House Bill No. 11211 o Death Penalty for Corruption Act, na kun saen ini an padusang kagadanan sa paagi kan firing squad para sa mga tiwaling opisyal kan gobyerno.
Bagamat an intensyon kan propwesto iyo para takuton an public officials para ibitaran an mangurap, nagtutubod an CHR na bako ini epektibong solusyon.
Susog sa komisyon, sarong grave offense an korapsyon alagad pigtaram man kaini na dae masisimbag kan nasambit na marahas na padusa an problema sa korapsyon imbes pighahadlangan kan propwesto an pangangaipuhan para sa sistematikong reporma asin nililihis kaini an pokus gikan sa preventative measure siring kan pagpapakusog kan mga mekanismo sa paninimbagan asin governance systems.
Nagpagirumdom man an CHR sa House Leaders na ipigbabawal an death penalty sa irarom kan 1987 Constitution.
