Nangapudan si House Deputy Minority Leader asin Mamamayang Liberal (ML) Rep. Leila M. de Lima para sa tulos na pagpasar kan sarong ley na magpapadusa sa mga extrajudicial killings (EJK).
Kasabay kaini an pagromdom sa ika-walong taong anibersaryo kan paggadan ki Kian delos Santos, saro sa mga suboot biktima kan EJK.
Sinabi niya na an paggadan ki Kian nagserbing patanid sa mga Pilipino na totoo asin sistematiko an kadahasan kan kampanya kontra sa iligal na droga sa irarom kan administrasyon ni Duterte.
Naglalaom sinda na an mastermind kan mass killings an papaninimbagon kabale an gabos na kasabwat.
Katakod kaini, pigduon ni De Lima an importansya kan House Bill. No. 1432, na saiyang isinangat kan Hulyo 2025.
An katuyuhan kan bill na ini iyo an malinaw na tawan nin kaaraman asin padusahan an EJK asin iba pang mga katakod na aktibidad.
Kun maipapaotob, makakabilog digdi nin Inter-Agency Council Against Extrajudicial Killings na iyo an makapot kan imbestigasyon asin paninimbagon bako sana sa mga imbuelto gikan sa estado kundi pati na sa mga pribadong indibidwal.
An nasabing propwesto an nagbubugtak man nin penalidad na life imprisonment na warang posibilidad nin parole para sa mga pribadong violators.
Nangapudan man an mambabatas sa pagkrear nin EJK Victims’ Compensation Fund nganing matabangan an mga nabayaan na pamilya kan mga nagadan kan nakaaging administrasyon.
Mientrastanto, kan Hulyo ngonian na taon, an House Quad Committee nagsangat nin sarong ley na mamidbid an EJK bilang sarong heinous crime, na may katumbas na penalidad na habambuhay na pagkapreso asin bayad sa mga biktima.
