Inaprubaran kan Department of Budget and Management (DBM) an P2,000 across the board na umento sa honoraria kan mga paratukdo asin poll workers na maserbi sa 2025 midterm elections sa aldaw kan Lunes, Mayo 12.
Sa sarong pahayag, sinabi ni Department of Budget and Management Secretary Amenah Pangandaman na ini alinsunod sa direktiba ni Presidente Ferdinand Marcos Jr.
Susog sa opisyal, an bagong honoraria rates para sa mga maserbing electoral board chairperson an P12,000 gikan sa dating P10,000.
Makakaresibi man an poll clerk asin 3rd member nin P11,000 honoraria gikan sa dating P9,000 mantang an dating support staff naman an makakaresibi na nin P8,000 gikan sa dating P6,000.
Susog sa ahensya, nagbugtak nin P7.4 billion sa 2025 General Appropriations Act (GAA) para sa sweldo kan mga poll worker.
Basado sa datos kan Commission on Elections (Comelec), ipighayag kan Department of Budget and Management na nasa 758,549 an kabilogang poll workers para sa national asin local elections.
Pig-engganyar man ni Sec. Pangandaman an poll body na siertohon na makukua kan mga paratukdo asin poll workers an saindang compensation.
