LEGAZPI CITY — Dismayado an Albay Public Safety and Emergency Management Office (APSEMO) sa pagsuway kan nagkapirang dayuhang tour guide asin turista sa ipinautob na “no crater climb” sa bulkang Mayon mantang nasa abnormal na aktibdad ini.
Segun ki Dr. Cedric Daep, pamayo kan APSEMO, nakaabot sainda an impormasyon na nagsakat an mga dayuhang turista na may kaiba naman na dayo mang tour guide na dae suboot nakipagkoordinar sa Provincial Tourism Office asin sa saindang ahensya.
Natatakot kaya an opisyal na mangyari liwat an sarong aksidente siring kan taong 2014 kun saen apat na German nationals an nagadan.
Sinabi pa kan opisyal na posibleng mga mountain climbers an mga dayong tour guides na nakapasiring na sa lugar alagad dae naghagad nin permiso sa mga otorisadong personahes kan lokal na gobyerno.
Segun man ki Daep, kaipuhan ng pakarayon an an implementasyon kan rules and regulations kan ipinasar na ordinansa sa bulkan.
Kaipuhan kaya na maklarado an impormasyon ngane maipaluwas na an implementing guidelines na magiging basehan sa pag-implementa kan ley asin makontrol an mga nagbabalgar.
Dugang kaini, dapat na pakusugon an peace and order situation kun kaya dapat na maging aktibo an gobyerno partikular na an kapulisan sa pagbantay kan sitwasyon.
Piglalaoman kayang maruso an bisita ngunyan sa lugar kun kaya dapat na matawan an mga ini nin proteksyon asin safety support ngane na ma-enjoy kan mga bisita an saindang bakasyon.
An pagbakasyon sa Albay kan mga taga-ibang lugar an siertong dakulang bagay na makakatabang sa ekonomiya kan probinsya urog na sa pag-uswag kan turismo.
