LEGAZPI CITY-Pigpaplanuhan na iimplementar an sarong Day Care Center for the Elderly sa Barangay Maslog, Legazpi City sa masunod na taon.
Segun ki Punong Barangay Niño Albert Berjuega, sa intrevista kan Bombo Radyo Legazpi, na piglalaoman na marealisar ini para sa mga gurang na mawot na magkaigwa nin leisure, magtaong tabang sa sainda orog na sa lado kan salud asin iba pang mga programa.
Ini kasunod kan saindang request sa gobierno kun sain laoman na matawanan nin panahon an mga seniors sa saindang lugar ngani matabangan sinda sa pangurualdaw na pamumuhay enkaso sinda nagsosolo asin may kadifisilan.
Piglalaoman man ninda na sa masunod na taon, handa sinda sa pagserbisyo para sa saindang ka-barangay afuera sa saindang magayon asin kadakol na pagmidbid ngonian na taon.
Mensahe kan opisyal sa publiko, na sa nagdadangadang na kapaskuhan na lugod ipagirumdom sa gabos na sa tahaw kan kadifisilan na dai magdisuspirar sa anumang problema asin pinakimportante an kamotan ta an satuyang mga pamilya.
Mientrastanto, mahigot man na pinagbabawal an paggamit nin paputok o boga sa saindang lugar orog na para sa mga jovenes ngonian na papaabot na an kapaskuhan.
